मुंबई : राष्ट्रवादी काँग्रेस पक्षाची सन २०१८-२० पर्यंतची पक्षातंर्गत निवडणूक पार पडली असून, प्रदेशाध्यक्ष आमदार जयंत पाटील यांनी नागपूर ग्रामीण जिल्हाध्यक्ष आणि कार्याध्यक्षांच्या नियुक्त्या जाहीर केल्या आहेत.
आमदार पाटील यांनी प्रदेशाध्यक्ष पदाची सूत्रे हाती घेतल्यानंतर पक्षातंर्गत निवडणूक पार पडली. यामध्ये पक्षाची संपूर्ण कार्यकारिणी निवडण्यात आली आहे. त्यामधून उर्वरीत जिल्हाध्यक्ष आणि कार्याध्यक्षांच्या नियुक्त्या जाहीर केल्या जात आहेत. त्यामध्ये नागपूर ग्रामीण जिल्हाध्यक्षपदी बाबा गुजर आणि कार्याध्यक्षपदी राजाभाऊ टाकसाळे यांची नियुक्ती करण्यात आली असल्याची माहिती प्रदेश सरचिटणीस शिवाजीराव गर्जे यांनी दिली.
दरम्यान नवनिर्वाचित जिल्हाध्यक्ष आणि कार्याध्यक्षांचे प्रदेशाध्यक्ष आमदार पाटील यांनी अभिनंदन केले आहे.